Hikmah bersedekah (bahasa jawa)

Assalamu’alaikum wr.wb

Alhamdulillah,  Para sedherek mangga kita sami tansah memuji lan ngunjukaken raos syukur ing ngarsanipun Allah SWt., ingkang sampun maringi kanikmatan, rizki, rahmat ugi hidayah arupi kasarasan, Iman saha Islam.

Shalawat saha salam, tansah kaunjukaken dhumateng panutan kita Nabi Muhammad SAW, ingkang sampun kautus dening Allah SWt. kagem nuntun umat manungsa pinuju margi ingkang leres lan sae. 

Mugia rahmat nun salam kaparingaken dhumateng keluarga Nabi Muhammad SAW, para shohabat, tabiin – tabi’ut-tabiin, sedaya umat muslim khususan ingkang kersa netepi ugi njagi sunah-sunahipun Rasulullah SAW. Insya Allah, mugi kalebet kula lan panjenengan sedaya.

Para sedherek ingkang dirahmati Allah,

Wonten ing mriki kula badhe ngandharaken sakedhik ngelmu babagan keutamaning Shodaqoh.

Shodaqoh inggih menika salah satunggaling sunnah Rasul ingka dipuntuntunaken. Shodaqoh mbok bilih namung sakedhik, nanging ageng mupangate ing ngarsanipun Allah SWt. Tiyang ingkang bakhil lan kikir ingkang mboten purun nyodaqohaken saperangan bandhanipun sampun kapethekaken bakal nemoni karugen wonten ing kauripan wonten ing alam donya ugi ing akhirat tembe besuke. Sejatosipun, tiyang ingkang numindakaken sodaqoh menika boten sanes kagem kabagusanipun piyambak-piyambak. Nginfa’aken utawi ngginakaken bandha donya kagem shodaqoh menika bakale badhe pikantuk berkah, kosok wangsulipun menawi bandha donya menika namung diunthuk-unthuk lan diuya-uya nggih bakalipun ngadhepi kacilakan.

Wonten ing Al Quran Surat Al-Hadid ayat 18 Allah berfirman Ingkang artosipun: “Sejatosipun tiyang-tiyang ingkang medalaken sodaqoh jaler utawi estri lan ngampilaken marang Allah ingkang sae, dipun pesthekaken badhe piwale makaping-kaping (diparingi luwih dening Allah) marang sedaya menika, lan kagem sinten kemawon pahala ingkang kathah.”

Shodaqoh kagungan kathah kautaman lan nilai ingkang ageng ing ngarsanipun Allah SWt. ugi Rasul-Ipun. Kautaman saking shodaqoh antawisipun inggih menika :

1.   Saged ngindharaken saking geni neraka sanadyan namung sakedhik ingkang saged dipun shodaqohaken, menika boten ateges kikir namung amargi boten saged medalaken shodaqoh kang kathah, gampilipun menawi ugi boten kagunga bandha donya, namung nglampahi ingkang sae kemawon saget kapetung shodaqoh.

2.   Pikantuk pahala ingkang ageng, sampun kapesthekaken mbok bilih pahala saking shodaqoh menika bakalipun makaping kaping piwalesanipun saking Allah, napa malih sadaqah arupi wakaf, saenipun pahala saking amalan menika saged teras mili ngantos akhir zaman. Rasulullah SAW nate atur Sabda : “Menawi lare adam wafat, pedhot sedaya amalipun kajaba tigang perkara, yaiku shodaqoh jariyah, ilmu ingkang mupangat lan lare shaleh ingkang tansah ndedongakaken tiyang sepuh.” (HR.Muslim).

3.   Saged nekaaken rejeki kang enggal kawales saking Allah SWt. Saking shodaqoh ingkang sampun kaedalaken. Menawi kita maringi saking menapa ingkang kita gadhah, Allah bakal mbangsulaken linuwih kthah malih, Allah sampun janji badhe mbales kaping 10 kaping kagem tiyang kang tumindak kabagusan.

4.   Shodaqoh saged dados naungan ing benjag kiyamat kagem tiyang ingkang numindakaken shodaqoh kanthi ikhlas, saengga sedaya kabagusan ingkang dipun lampahi ing donya menika dados sangu kita ing tembe besuke. Rasulullah SAW nate atur Sabda : “naungan kagem tiyang mu’min wonten ing dinten kiyamat inggih menika shodaqohipun” (HR.Baihaki)

Rasulullah ngajaraken marang kita supados medalaken shodaqoh, utawi tetulung marang sapadha supados Allah bakal peparing marang kita kacukupan ugi.

Saking jlentreha bab shodaqoh ing nginggil punika, kita saged mangertosi menawi sedaya tiyang muslim kedah medalaken shodaqoh lan boten wonten alesan kangge mboten nglampahi amargi bab menika saged dipuntumindakaken ing maneka rupa, mboten amung ngginakaken bandha donya kemawon.

Para sedherek, mugi-mugi Allah tansah nggangsaraken sedaya upaya kita anggenipun medalaken shodaqoh, ngenthengaken laku anggenipun kita tetulung ing sesami, ugi supados Allah maringi ampun marang dosa-dosa kita sedaya.

Para sedherek ingkang dipun rahmati Allah

Cekap semanten andharan saking kula, mugiaa kita saged pikatuk mupangat saking andharan wau. Ing pungkasaning atur, mbok pilih kathah klenta-klentunipun anggenipun kula ngandharaken materi, kula nyuwun samudraning pangaksami.

Wassalamualaikum Wr.Wb.